Unha xornada en Fonteboa

O día comeza ás 8 da mañá. Hai que asearse e facer a cama. Despóis ven o almorzo ao que sigue unha hora de estudo obrigatoria e previa ás clases, que se prolongan ata as dúas da tarde. A esa hora os propios alumnos, por quendas, colocan a mesa e serven o almorzo aos seus compañeiros.

Durante a tarde, as clases son de 15.30 a 18.00 horas. Despois veñen horas de lecer antes da cea e outra hora de estudo antes de irse para a cama. “O ritmo de traballo lévase ben –sinala Marcos-, porque ao pasar tanto tempo xuntos acabamos sendo coma unha familia”. Este escolar, que leva catro anos no centro, loa a forma en que se encaran os conflictos que xurden na convivencia cotiá onde, relata, priman sempre o diálogo e as boas formas. “Se hai problemas non chaman directamente aos teus pais como noutros sitios, senón que se fala e se tenta buscar unha solución ao problema”.

Luis García Fernández, director da escola durante 11 anos e agora coordinador de actividades e profesor, non esconde a súa ilusión por un proxecto que leva 30 anos funcionando con moi bos resultados. “Seguimos a traballar coa mesma ilusión que ao principio, pois cremos firmemente neste proxecto”.

No tocante á formación dos estudantes da EFA –segundo ciclo de ESO e grao medio, (Explotacións Agrarias)-, García Fernández resalta que os estudantes coinciden diariamente con outros rapaces do medio rural, o que supón para eles confrontar experiencias e valores engadidos á formación. Por último, non dubida en afirmar que “a finca de prácticas é a propia explotación e o laboratorio é o seu pobo. Nas EFA procuramos preparar aos alumnos non para emigrar mellor, senón para quedarse con dignidade e satisfación no seu medio”.